logo Undredal Stølsysteri

– Ysteriet midt i verdsarven

Sognakvitost

Sognakvitosten er laga av nysilt (rå) geitemjølk, syrekultur og løype. Osten finst i tre mogningsgrader: nylagra, mellomlagra og vellagra.

Osten frå Undredal representerer ein tradisjon som var felles for dei indre Sognebygdene. Difor kallar vi den usalta kvitostvarianten vår for Sognakvitost. Sognakvitosten vart, og blir framleis brukt, i det daglege kosthaldet til middag og saltmat.

Oppbevaring

Oppbevar osten kjølig, godt innpakka eller i osteklokke. Temperer før måltidet.

Bruksområde

Sognakvitost har ein heilt annan smak enn Kvit Undredal fordi han ikkje er salta. Difor høver Sognakvitosten godt i kombinasjon med annan mat som har sterk, salt eller syrlig smak. Du kan til dømes bruke han i staden for rømme eller milde ostar som mozarella. Tradisjonelt vert han brukt i lag med betasuppe, spekesild, rakfisk og spekekjøt.

Emballasje

Osten vert seld i lausvekt på marknader, i gardsbutikkar og delikatesseforretningar og i nokre kjedebutikkar.
Ein heil Sognakvitost veg om lag 3 kg

Betasuppe

Suppe er god og næringsrik mat. Med Sognakvitost og brødmat som tilbehør, blir denne retten ei smakfull oppleving. Betasuppe kan lagast i mange variantar – bruk dei råvarene du har! Her er eit forslag:

Ca. 1- 1,5 kg grytekjøtt (gjerne ulike typar kjøtt og gjerne blanda salt og ferskt)
Rotfrukt av forskjellig slag
Grønsaker
Krydder, urter og smakstilsetningar
Vatn
Sognakvitost

La kjøtet trekke i to til tre timar med krydder og smakstilsetningar etter eige ønskje. Forslag: lauk i båtar, gulrøter i bitar, eplebåtar. Urter som løpstikke, timian, rosmarin, chili, heil peppar. Om du ønskjer ein meir eksotisk vri, kan du ha i nokre heile kardemommefrø, nokre skjever fersk ingefær, ei lita kanelstang og nokre spiseskeier kaffi.

Når kjøttet er mørt, tar du det ut av kjelen. Sil krafta gjennom et dørslag. Kok rotfrukter-terningar i krafta. Forslag: gulrøter, kålrot, potet, persillerot. Suppler med bønner, sukkererter, brokkoli eller paprika etter ønskje. Plukk kjøtet reint og i småbitar, og legg det tilbake i gryta. Smak til med salt og pepar, buljong, østerssaus, chilisaus og fleire grøne urter.

Server saman med sjenerøse bitar Sognakvitost og flatbrød, lefse eller brød.

  • Brun Undredal

    Kvit Undredal